Njoftim për procesin e aplikimit për marrjen e Certifikatave EuroPsy

Kjo është një prej arritjeve më të mëdha jo vetëm e një grupi shumë të përkushtuar që ka punuar për vite për këtë proces, por e të gjithëve ne së bashku.

Marrja e kësaj certifikate do të thotë lehtësim i mobilitetit të psikologëve në vendet anëtare të Federatës Evropiane të Psikologëve si dhe lehtësim i procedurave për regjistrim të profesionit në këto vende.

E them gjithmonë që këto janë arritjet e mëdha të psikologëve të Shqipërisë, këto janë arritjet e mëdha që shënjojnë profesionin dhe suksesin, që marrin pafund kohë e mundim për të ardhur deri këtu. Këto janë arritjet që na lartësojnë dhe na bëjnë të ndihemi të barabartë me kolegët evropianë.

Uroj që kushdo të kuptojë dashurinë e madhe me të cilën është punuar për të lartësuar këtë profesion.

Psikologjinë ose duhet ta duash shumë ose mos e bëj fare, rrugë të mesme nuk ka!

Jam e nderuar që kemi bërë ndër vite këtë rrugëtim bashkë dhe e privilegjuar që me shumë pasion kemi ndërtuar pak nga pak, çdo ditë.

Disa vite më parë, nuk do ta kisha besuar që do arrinim deri këtu. Një profesion i vogël nga një vend i vogël, që njihet në të gjithë Evropën.

Gëzohuni bashkë me ne miq të psikologjisë, lartësimi i profesionit do të thotë definitivisht shërbim më cilësor.

Me shumë dashuri

Valbona Treska

Presidente U.P.SH.